Muxía presentará en Fitur a Primeira Semana de Exaltación do Percebe

O Concello de Muxía presentará a vindeira semana na Feria Internacional de Turismo (Fitur), en Madrid, a súa nova aposta turístico-cultural: a I Semana de Exaltación do Percebe. O obxectivo da iniciativa é «poñer en valor e preservar a identidade muxiá, vinculada á cultura, a tradición e a natureza», segundo a concelleira de Cultura e Turismo, Sandra Vilela.

«Queremos que tanto a nosa veciñanza como as persoas que nos visiten gocen deses días a través de numerosas iniciativas para dar a coñecer a nosa cultura e tradición. Pretendemos preservar a esencia da nosa identidade, do que é Muxía. Por iso escollemos o lema Percibe Muxía, xa que encaixa tanto pola súa similitude co percebe como polo sentido do que buscamos transmitir a través desta experiencia», explica a concelleira.

La Asociación de Percebeiros de Muxía acerca la cultura marinera a las aulas de Costa da Morte

Deste xeito, durante as datas da I Semana de Exaltación do Percebe (aínda por desvelar) Muxía acollerá diversas actividades vinculadas a potenciar necesarios valores relacionados co medio ambiente, a sustentabilidade do recurso marítimo ou a figura da muller do mar.

«Tamén haberá, por suposto, degustacións do produto. Pero esas catas non serán o fío condutor. Non queremos crear unha festa gastronómica», dixo Vilela.

Os tres eixos da I Semana de Exaltación do Percebe son a valoración da identidade e cultura, o coidado e a sustentabilidade da natureza e o papel da muller de xeito especial no mundo do mar.

O alcalde, Javier Sar, e a edil de Cultura e Turismo xa teñen concertadas reunións con diferentes axentes turísticos en Fitur, entre os vindeiros días 22 e 24 deste mes, para explicarlles este novo proxecto, que comeza a vertebrar «un xeito diferente de promover o turismo, máis pensado e mimado, que fuxa das aglomeracións porque si», segundo Sandra Vilela.