Dous docentes de Zas publican o primeiro manual escolar galego sobre Intelixencia Artificial

A directora xeral de Ordenación e Innovación Educativa, Judith Fernández, visitou este martes o IES Maximino Romero de Lema, en Zas, onde gabou a aposta pola innovación educativa dos dous docentes deste centro que son autores do primeiro manual escolar de Intelixencia Artificial en Galicia.

A representante da Consellería de Educación, Ciencia, Universidades e FP tivo a oportunidade de afondar cos dous profesores do departamento de Informática, Fina Paulos e Óscar Rey, nos detalles da publicación e na súa utilidade para abordar un enfoque responsable das posibilidades da Intelixencia Artificial. 

A directora xeral explicou que foi precisamente esta necesidade de fomentar un uso axeitado desta nova ferramenta desde a escola o que impulsou ao Goberno galego a poñer en marcha a materia Intelixencia Artificial para a sociedade en cuarto da ESO, que se complementa en primeiro de Bacharelato coa materia Tecnoloxías Intelixentes. Entre as dúas, no seu segundo curso de implantación, contan xa con máis de 3.000 alumnos matriculados.

Editado por Medulia, o manual Intelixencia Artificial para a sociedade propón un achegamento a estas novas tecnoloxías desde unha visión clara e pedagóxica. Inclúe tanto a perspectiva teórica, cun repaso sobre a evolución da disciplina, como múltiple supostos prácticos con información ao redor das principais ferramentas neste eido e as súas posibilidades de aplicación. O libro reflexiona, así mesmo, sobre os desafíos éticos, sociais e legais da IA. 

O pasado mes de cecembro, Fina Paulos Lareo foi seleccionada como finalista nos VIII Premios Educa Abanca (considerados os Goya do eido educativo) na categoría de Secundaria e Bacharelato, sendo recoñecida como unha das dez mellores docentes de España.

Este logro engádese a unha traxectoria de éxitos que xa inclúen o 2º premio Educa Abanca en 2019 na categoría de FP.

Fina Paulos, cunha ampla experiencia no ensino, destacou nos últimos anos pola súa capacidade de innovación e pola introdución de novos enfoques pedagóxicos, especialmente no campo da Intelixencia Artificial, onde coordinou proxectos co seu alumnado que axudaron a fomentar valores e a mellorar a vida das persoas con diversidade.