Ames negocia coa Sareb a cesión de solos para crear vivenda pública e zonas verdes

O alcalde de Ames, Blas García, mantivo onte unha xuntanza co director de Xestión de Administracións Públicas e Relacións Institucionais da Sociedad de Gestión de Activos Procedentes de la Reestructuración Bancaria (Sareb), Alberto Molowny, con quen negociou a posible cesión por parte desta entidade de varias parcelas das que dispón no municipio e que na actualidade non teñen ningún tipo de uso concreto.

O obxectivo do goberno amesán é que este solo se poida dedicar tanto á promoción de vivendas públicas conveniada co Instituto Galego de Vivenda e Solo (IGVS) na vila do Milladoiro como á creación de novas zonas verdes e sendas peonís na contorna de Bertamiráns.

Deste xeito, as conversas trataron sobre unha parcela concreta, ubicada no polígono S-16 Galdrachán do Milladoiro, para incrementar en 37 vivendas a oferta que o IGVS prevé construír en vindeiras datas nesta urbe. A mencionada parcela da Sareb atópase nas inmediacións da casa da cultura e moi preto do pavillón municipal, e ocupa unha superficie de 966 metros cadrados, cunha edificabilidade residencial máxima de máis de 3.000 metros cadrados.

De acadarse a súa cesión, pasaría a formar parte dun proxecto para erguer ata 213 vivendas nesta área, cunha superficie de urbanización que, xunto aos outros seis terreos aportados polo Concello, superaría a media hectárea.

Avanza el convenio para construir más de 100 pisos protegidos en Milladoiro

Por outra parte, no relativo á creación de máis zonas verdes, espazos de esparexemento e sendas peonís, o executivo amesán requeriu a cesión de varias parcelas, cunha superficie total de tres hectáreas, nos lugares de Cantalarrana, a travesía de Fontaldeiro, a rúa da Fragua e a travesía do Pedregal.

O Concello comprométese a acondicionalas e a facerse cargo do seu mantemento para que teñan un uso público, mentres a Sareb non decide para que serán finalmente empregados.