Retiran máis de 562 quilos de lixo das praias de Razo e Baldaio, en Carballo

As praias de Baldaio e Razo (Carballo), un lugar protexido catalogado como Zona de Especial Protección para as Aves dentro da Rede Natura 2000 de Galicia, acolleron este xoves unha nova operación de limpeza de lixo mariño organizada pola Obra Social de Abanca no marco do seu Plan de Conservación Territorial, Plancton.

Un grupo de estudantes e docentes do Centro de FP Afundación da Coruña retiraron máis de 562,5 quilos de lixo mariño.

Foi a cuarta limpeza realizada polos voluntarios nesa zona protexida, unha braña na que adoita criar a píllara das dunas, unha especie avícola ameazada que aproveita determinados areais de Galicia, provistos de cordóns dunares con vexetación máis ou menos densa, para criar entre marzo e xullo.

O operativo de limpeza, formado por varios grupos repartidos en distintas zonas do areal, comezou ás dez da mañá. As persoas voluntarias recolleron fundamentalmente obxectos de orixe terrestre e uso cotián, como restos de envases, bolsas e envoltorios, botes, botellas, tapóns, bastonciños de limpar os oídos, pequenas boliñas plásticas empregadas como materia prima para a fabricación de multitude de produtos plásticos, como as que chegaron ás costas de Galicia tras o vertido accidental do Toconao fronte ás costas portuguesas a principios de 2024, así como outra serie de obxectos plásticos relacionados coa pesca extraviados durante o seu exercicio, como boias, marañas de sedelas, pequenos anacos de cabos, cordas e cabiños, escumas sintéticas, etc.

A de Baldaio e Razo é a primeira das actuacións de limpeza de lixos mariños repartidas por toda a costa galega que ten programadas Afundación para este ano no marco do proxecto Plancton. Este plan de conservación do territorio impulsado pola Obra Social de Abanca, que inicia a súa quinta edición, leva xa retiradas máis de 95 toneladas de refugallos dos fondos e costas da comunidade.

Con esta iniciativa, Afundación procura fundamentalmente, e como grande eixo vertebrador do proxecto, fomentar a conservación e sostibilidade do conxunto de actividades sociais e económicas que se realizan no mar.