Carballo aparca a proposta de Costas para Razo e Baldaio

A Corporación municipal de Carballo deixou sobre a mesa a proposta da Demarcación de Costas para que o Concello asuma o mantemento das actuacións incluídas no proxecto de loita contra a erosión na costa.

O alcalde, Evencio Ferrero, optou por adiar o acordo despois de que o PSOE e o PP expresasen o seu rexeitamento ás obras previstas, e á espera de volver contactar con Costas para intentar solucionar a situación na que quedaría o campo de fútbol.

En Baldaio, o proxecto de Costas inclúe a colocación de pilotes con corda para evitar o paso peonil ao sistema de dunas; a apertura dun novo sendeiro para evitar danar a cuberta vexetal; o peche do resto das sendas para evitar o tránsito peonil polo sistema de dunas;a revexetación das zonas máis degradadas plantando especies de dunas e captadores de area; e a colocación de cartelaría informativa.

En Razo prevé colocar dúas pasarelas de madeira con varandas; derribar a antiga pasarela de madeira (en mal estado), as duchas situadas na area e o cerramento do campo de fútbol; colocar peches de pilotes con corda e abrir novos sendeiros alternativos; a retirada do antigo peche de pilotes con corda; e a reparación da pasarela de madeira.

O campo de fútbol está abocado á desaparición desde hai anos; tras a retirada do peche perimetral non podería usarse para competicións oficiais. O goberno local comprometeuse a buscar unha alternativa para os equipos que o utilizan, á espera da construción dun novo campo.