Revisarase o impacto en vivendas de Osebe e Francos das pantallas acústicas de Adif

Responsables do Administrador de Infraestructuras Ferroviarias (Adif) accederán á petición dos veciños dos lugares teenses de Francos e Osebe e revisarán a posible afectación ás vivendas destas zonas pola instalación de pantallas de protección contra a contaminación acústica de grandes dimensións nas inmediacións das vías do tren.

Este foi o compromiso que lle trasladaron onte á alcaldesa de Teo, Lucía Calvo, no marco dunha reunión para abordar este asunto, fonte de importantes queixas a nivel local. O propio pleno teense chegou a aprobar por vía de urxencia unha moción a instancias do grupo do PP na que a corporación conminaba ao Ministerio de Transportes e Mobilidade Sostible a revisar os cálculos de illamento e propagación acústica para procurar unha solución alternativa que supuxera unha menor afectación.

Piden a revisión da protección acústica do tren ao paso por lugares de Teo

Tanto en Francos como en Osebe foron instaladas grandes pantallas opacas, de entre tres e cinco metros de altura en función do lugar, que, segundo denuncian os veciños, afectan á calidade da iluminación e á amplitude visual das súas vivendas.

Sinalan tamén que as pantallas anteriores non superaban os dous metros de altura e, ademais, estaban feitas de materiais translúcidos, co cal o seu impacto resultaba moito menor que o que están a ter as colocadas neste tramo do eixo atlántico de alta velocidade que discorre polo concello de Teo.