Entra en servizo en Boqueixón a nova depuradora de Sergude

A conselleira de Medio Ambiente e Cambio Climático, Ángeles Vázquez, e o alcalde de Boqueixón, Ovidio Rodeiro, visitaron este xoves a nova depuradora de augas residuais de Sergude, que contou cun investimento de máis de 1,8 millóns de euros.

As novas instalacións triplican a capacidade de tratamento da anterior depuradora emprazada en Lestedo (a primeira construída no municipio en 1991) ao chegar aos 3.000 habitantes equivalentes co ano 2042 como horizonte. O Goberno galego asumiu un 80% do investimento, e o Concello achegou máis de 360.000 €, puxo a disposición os terreos necesarios e asumirá o mantemento das instalacións.

A conselleira destacou que a nova planta permite mellorar a rede de saneamento e unificar o tratamento das augas residuais en Sergude e Lestedo. 

En 1991 fíxose en Lestedo a primeira depuradora, que agora é substituída pola nova. Nese ano o Concello puxo en marcha o servizo de saneamento. A día de hoxe conta con 92 quilómetros de tubaxes, 14 pequenas depuradoras e 13 bombeos, cun investimento de 8.000 euros por cada casa. Hai 1.478 enganches ao saneamento. 

A nova estación depuradora inclúe liña de auga e liña de lodos, con pretratamento e tratamento biolóxico, cunha capacidade media de 44 metros cúbicos de auga á hora, o que permitirá optimizar o tratamento de augas residuais nas localidades de Lestedo e Sergude. En caso de choivas intensas que superen o caudal punta, o exceso de augas enviarase a un tanque de tormentas.