Vedra asina coa Xunta o convenio para a reforma integral do centro de saúde

O conselleiro de Sanidade, Antonio Gómez Caamaño, e o alcalde de Vedra, Carlos Martínez Carrillo, asinaron onte o convenio de colaboración a través do cal ambas as dúas institucións levarán a cabo as obras de reforma e mellora integral do centro de saúde existente neste municipio.

Apenas mes e medio despois do anuncio do acordo acadado para realizar esta intervención, as dúas administracións confirmaron o seu pacto para uns traballos que requerirán un investimento conxunto de 540.000 euros, dos cales o oitenta por cento, preto de 430.000 euros, será sufragado polo executivo autonómico.

Ademais da cantidade restante, o Concello de Vedra asume as tarefas de redactar o proxecto e licitar e excutar as obras, co obxectivo -precisou no seu momento o alcalde- de que estean rematadas antes de que conclúa este ano 2025.

Reformarán o centro de saúde de Vedra tras corenta anos en funcionamento

Esta actuación de mellora contempla a creación dunha nova sala de urxencias para mellorar a resposta diante de situacións que requiran unha atención inmediata, así coma a unificación dos tamaños das consultas, a mellora da comunicación entre as mesmas e a habilitación duns aseos máis accesibles.

Outros traballos que se levarán a cabo no marco desta intervención centraranse en mellorar a eficiencia enerxética e o illamento do edificio, así como en renovar a carpintaría exterior do inmoble e a rampa de acceso para permitir unha mellor accesibilidade. Neste senso, tamén se rehabilitará o soportal da entrada.

O centro de saúde de Vedra leva máis de corenta anos en funcionamento sen que ata o de agora se levara a cabo unha reforma ou mellora susbtancial destas instalacións. No acto de sinatura do convenio, ademais do alcalde e do conselleiro de Sanidade; participaron a delegada da Xunta na provincia da Coruña, Belén do Campo; e a directora de Recursos Económicos do Servizo Galego de Saúde, Amparo Pousada.