Ames lembra a Rosalía de Castro con música, teatro, andainas e arte urbana

Ames volverá lembrar a Rosalía de Castro con motivo do aniversario do seu nacemento. O Goberno municipal presentou onte a programación coa que, durante varias semanas dos meses de febreiro e marzo, exaltará a memoria dunha das figuras máis senlleiras das letras galegas e fundamental no rexurdimento desta lingua na arte escrita.

Farao, ademais, dun xeito no que estará moi presente o vínculo que unía a Rosalía con esta terra e do que existe fiel reflexo na propia obra da escritora. Hoxe mesmo, venres 14 de febreiro, terá lugar no auditorio do Milladoiro ás 18:00 horas a primeira destas actividades: Rosalía cantareira, un concerto didáctico a cargo de Jara Ortiz, tamén parte do programa Apego do Concello de Ames, e pensado para achegar á cativada á parte máis musical da obra da poeta.

Será o primeiro acto dunha programación deseñada e coordinada por varios departamentos municipais co obxectivo de «revitalizar o pensamento, figura e obra» dunha Rosalía de Castro en cuxo recordo queren implicar a toda a veciñanza con eventos de todo tipo.

Arte urbana

A principal novidade desta edición do Día de Rosalía será a intervención urbana que levará a cabo o artista Fernando Yáñez, coñecido por ilustrar os murais solidarios da fundación Art for Dent, nas rúas de Bertamiráns e do Milladoiro. Alí pintará catro caixas de semáforos coa silueta da autora e algúns dos seus versos para completar un conxunto de murais que xa se iniciou o ano pasado coa pintura solidaria que a asociación á que pertence realizou na avenida da Maía de Bertamiráns.

Caldo de Gloria

Ademais, os actos en lembranza de Rosalía de Castro chegarán aos centros educativos amesáns, en cuxos comedores se servirá o día 21 de febreiro o famoso Caldo de Gloria. Este prato tradicional vén descrito no poema rosaliano Miña casiña, meu lar, incluído na súa obra Follas novas, onde unha muller pobre conta como consegue, malia as adversidades que a rodean, facer este caldo, que este ano poderán degustar os estudantes dos colexios de Ventín, Barouta, Agro do Muíño e A Maía.

Pensando na cativada, o Concello de Ames tamén promoverá obradoiros de debuxo destinados ao alumnado de Primaria, que terán lugar o venres 21 de febreiro no Milladoiro e o sábado 22 en Bertamiráns e nos que os participantes poderán explorar a súa creatividade mentres coñecen as obras da ilustre escritora galega. Estas actividades requirirán de inscrición previa.

Tamén será preciso apuntarse con antelación a outra das actividades habituais deste ciclo en memoria de Rosalía de Castro: a excursión literaria á casa da poeta en Padrón, que será guiada pola especialista María López Sández e que incluirá paradas en escenarios da súa obra, como as parroquias de Ortoño e Bastavales.

Gala rosaliana

O luns 24 de febreiro celebrarase na casa da cultura de Bertamiráns o evento central desta programación en memoria da literata: unha gala homenaxe que será presentada pola comunicadora e actriz Cristina Collazo. Nela está prevista a actuación musical de Uxía Senlle e Santi Cribeiro, así como a participación de todo o alumnado dos centros educativos de Ames e outros colectivos en representación da veciñanza, que lembrarán a Rosalía a través de recitados, concertos, actuacións e proxeccións. O evento comezará ás 19:00 horas e será de entrada libre ata completar o aforo.

Con todo, os actos de recordo non finalizarán aquí, xa que nas semanas seguintes haberá, por exemplo, varias andainas teatralizadas pola Costa do Mar de Ovellas, baseadas no poema A probiña, que está xorda, nas que colaborarán os membros do grupo Os Quinquilláns e a regueifeira Lupe Blanco. Tres delas serán funcións específicas para os institutos de Ames, aínda que unha estará aberta ao público xeral. Será a que se celebre o día 9 de marzo, que irá do lugar de Aguapesada ao de Trasmonte, e a cuxo remate haberá unha pequena festa con música e degustación de petiscos. O resto de andainas serán os días 18 de febreiro, 11 de marzo e 17 de marzo.

Vínculo con Ames

Durante a presentación de todas estas actividades, o alcalde de Ames, Blas García, asegurou que este concello é «referente» en «salientar a figura de Rosalía de Castro» e a súa conexión con este municipio. «Gústanos poñer en valor a súa figura e tamén amosar todo o que segue representando hoxe en día», dixo.

Así mesmo, no acto de presentación, a técnica municipal de Normalización Lingüística do Concello de Ames, Rosa Moreiras, sinalou que «é moi necesario seguir traballando» con esta figura «e transmitir esa imaxe dunha Rosalía de Castro empoderada, unha muller culta e feminista, comprometida con todas as causas xustas e, como non, coa lingua galega».

Suscríbete para seguir leyendo