Presentan unha moción para dar apoio ao persoal da Escola Infantil Merlín de Bertamiráns

O grupo municipal do BNG no Concello de Ames rexistrou onte unha moción para o seu debate en pleno coa que pretende lograr o apoio de toda a corporación amesá ao persoal da Escola Infantil Merlín, ubicada en Bertamiráns, ante o conflito laboral que manteñen coa empresa responsable deste servizo.

Segundo expuxo a voceira nacionalista, Escarlata Pampín, malia que a orixe da situación se remonta a decembro de 2023, cando comezaron os atrasos nos pagos das nóminas; agora esta é xa “insostible” despois de que a propiedade decidira despedir a unha das traballadoras, en situación de incapacidade temporal, e reducira unilateralmente a xornada asignada a outra das persoas contratadas.

O persoal da Escola Infantil Merlín de Bertamiráns denuncia novos impagos de nóminas

No BNG entenden que se trata dunha “represalia” cara a estas persoas por terse organizado sindicalmente e reclaman para elas o apoio do pleno da corporación. De igual xeito, solicitan á Xunta de Galicia que medie neste conflito e garanta a readmisión da traballadora despedida, así como o cumprimento dos dereitos laborais.

Respecto do goberno local, a moción defende que se contacto coa Consellería de Política Social ata acadar “unha solución eficaz” a este conflito”.

A iniciativa debatirase no vindeiro pleno ordinario do Concello de Ames, que terá lugar, como de costume, o último xoves do presente mes.