Unha matachina protagoniza por primeira vez a Matanza do Porco de Lalín

A pesar da chuvia que caeu desde a primeira hora, intensa, por momentos, centos de persoas asistiron este domingo en Lalín á tradicional Matanza do Porco, que se celebrou na casa de Amorín, en Antuín (Catasós) e na que participaron máis de 150 persoas.

Entre os asistentes estaban o conselleiro de Educación, Román Rodríguez; o alcalde, José Crespo; e a deputada provincial Belén Cachafeiro. A celebración comezou ás once da mañá coa interpretación de pezas musicais por parte do grupo Os Dezas de Moneixas.

Logo, os veciños e veciñas empezaron os traballos da recreación da matanza, narrada en directo polo xornalista Gúmer Portas, de Radio Lalín, e polo cronista oficial de Lalín e Comendador do Cocido, Daniel González Alén, quenes achegaron aos visitantes aspectos historiográficos, etnográficos, culturais e ata anecdóticos ao redor deste evento que está tan enraizado nas nosas tradicións.

Este ano exerceu por primeira vez como matachina unha muller, Luísa Batán, que leva desempeñado este quefacer desde os 16 anos. O porco foi un exemplar lalaíno, fillo de nai celta e pai Duroc, semellante aos porcos que se sacrificaban antigamente nas casas galegas, criado fóra e alimentado con landras e castañas.

Os homes carrexaron en carro o porco ata o enlousado da casa onde se levaron a cabo os traballos de chamusque, mentres outro grupo de veciños levaba ata o lugar a Lalaina, a porca que participará no desfile da 57ª Feira do Cocido o vindeiro domingo 23.

Tras o chamusque o porco foi levado ata o curro (patio central das casas de labranza) onde se colgou e se pesou. Cunha balanza tradicional, o pedáneo da parroquia, Antonio Fernández, testemuñou que o exemplar pesaba 190 quilos.

Posteriormente un sacerdote (caracterizado para a ocasión) bendiciu o porco. Despois empezou a elaboración da zorza e chourizos. Durante toda a mañá houbo representacións de oficios tradicionais e coceuse pan nun forno tradicional, que se deu a degustar entre os visitantes.

Ao remate houbo degustación de produtos típicos da matanza (como panceta e chourizos), ademais de filloas, orellas e cañas preparadas polas veciñas. Pola tarde actuou o Dúo Dilema.