O Concello de Val do Dubra formaliza a súa oposición ao vertedoiro de Niveiro

O Concello de Val do Dubra formalizou a súa oposición ao proxecto para instalar un vertedoiro na antiga canteira de Niveiro coa presentación das súas alegacións ante a Sección de Minas da Xunta de Galicia.

O executivo dubrés, dirixido polo alcalde Diego Luis Díaz Méndez, rexeita o proxecto existente para a rehabilitación deste espazo en base aos informes municipais e ao elaborado pola empresa TYSGAL, que —aseguran— «poñen de manifesto diversas deficiencias na documentación presentada e a incompatibilidade do proxecto cos valores ambientais, paisaxísticos e socioeconómicos da zona».

Do proxecto para a antiga canteira preocupa especialmente no Concello o impacto negativo que tería a instalación deste vertedoiro por diferentes motivos; ademais de que o rexeitamento espertado entre a veciñanza pon de manifesto a «ausencia de licenza social para a súa execución».

Veciños de Val do Dubra colocan unha pancarta xigante contra o vertedoiro de Niveiro

Val do Dubra solicita, pois, a Minas, que non autorice o proxecto e insta á promotora do mesmo a presentar unha nova proposta «que priorice a restauración ambiental do espazo degradado, garantindo a protección do entorno e o benestar da comunidade».

Dende a saída a información pública do plan para Niveiro a Xunta ten recibido preto de 2.500 alegacións contrarias á instalación deste vertedoiro como parte dunha campaña levada a cabo por diferentes entidades ecoloxistas e medioambientais.