Ames abre o prazo de inscrición en comedores e outros concilias

O Concello de Ames anunciou onte que o prazo para solicitar praza ou renovar as xa existentes nos servizos complementarios de educación e conciliación de titularidade municipal está xa aberto e estará dispoñible ata o vindeiro día 31 do presente mes de marzo.

Non se aplicará, de momento, o novo regulamento que rexe o acceso a estas prestacións aprobado recentemente en pleno, dado que non é posible facelo polos prazos da súa tramitación. Dita modificación foi obxecto de discrepancias entre as forzas políticas da corporación amesá no seu momento.

PP e PSOE alíanse en Ames para sacar adiante a reforma do regulamento dos comedores escolares

Así pois, os usuarios e usuarias da rede de comedores escolares e dos programas de conciliación Bos días cole e Tardes divertidas terán todo este mes de marzo para tramitar as súas solicitudes a través da sede electrónica municipal ou nas oficinas do Concello.

Estes programas teñen como principal obxectivo facilitar a conciliación familiar e laboral de todos os veciños e veciñas de Ames. Os servizos de conciliación ofértanse nas instalacións dos cinco centros de Educación Infantil e Primaria públicos deste municipio: CEIP Agro do Muíño, CEIP A Maía, CEIP de Barouta, CEP de Ventín e EEI do Milladoiro. Ademais, o servizo de Bos días e os comedores escolares ofértanse tamén na EEI A Igrexa e EEI de Covas.