Hipotecas e electricidade acaparan a maior parte das consultas a Consumo en Ames

As vilas de Bertamiráns e do Milladoiro manteñen dende hai uns anos unhas oficinas do consumidor que, durante un día á semana, asesoran aos veciños e veciñas destas poboacións ante posibles infraccións e tratos abusivos por parte das empresas e os comercios.

Só no ano 2024, estas sedes recibiron ata 425 consultas diferentes, de acordo cos datos feitos públicos onte polo Concello de Ames e a Unión de Consumidores de Galicia (UCGAL), responsable destes espazos.

A maioría destes requerimentos, o 36,8%, tiveron a ver coa suba dos gastos hipotecarios, especialmente durante o primeiro semestre do ano, no que foron o principal motivo das queixas. Nos seis primeiros meses de 2024, O Milladoiro e Bertamiráns contabilizaron ata 255 consultas, a maioría delas feitas por persoas menores de 65 anos.

Xa na segunda metade do ano, medrou a porcentaxe de actuacións relacionadas co custo da electricidade ou con servizos de telefonía; os máis relevantes dentro dunhas consultas que tamén trataron temas coma os prezos das viaxes e o transporte, as estafas bancarias ou o comercio.

A Oficina de Consumo de Boiro atendeu 2.276 consultas o pasado ano, con electricidade e telefonía como principais queixas

Aínda que o comportamento de ambas as dúas oficinas de Consumo é similar, dende a UCGAL sinalan que no Milladoiro os servizos básicos, coma o gas ou a luz, acaparan máis atención ca en Bertamiráns, cuxa área de actuación é «máis diversa».

O alcalde de Ames, Blas García, defendeu a pertinencia de seguir ofrecendo este servizo de forma presencial, posto que, segundo trasladou na rolda de prensa de presentación destes datos, axuda a ter unha mellor comunicación e a prestar unha atención máis individualizada e exhaustiva.