Un erro da Xunta obriga a ampliar o prazo para alegar contra o vertedoiro de Niveiro

As persoas interesadas en formular alegacións a favor ou en contra do proxecto de rehabilitación, peche e abandono da canteira de Niveiro, en Val do Dubra, onde Francisco Gómez y Cia, S. L. planea a apertura dun vertedoiro; dispoñen dun prazo extraordinario de dez hábiles máis para presentar os seus argumentos.

Isto débese a un erro cometido pola Xunta de Galicia durante a fase de exposición pública deste proxecto, cuxa documentación foi retirada de maneira prematura do portal oficial onde podía ser consultada.

Por este motivo, o Diario Oficial de Galicia publicaba este luns un anuncio coa ampliación deste prazo, tras as queixas presentadas tanto pola Asociación Medioambiental de Niveiro, que percibiu o erro, coma polo propio Concello de Val do Dubra, contrario a esta tramitación.

O Concello de Val do Dubra formaliza a súa oposición ao vertedoiro de Niveiro

Deste xeito, as persoas interesadas en formular as súas alegacións poderán presentar as mesmas ata o vindeiro día 24 de marzo, cando se pechará definitivamente o prazo de exposición pública deste proxecto.

Dende Val do Dubra, lembran que a Asociación Medioambiental de Niveiro ofrece modelos de alegacións para asinar e asesoramento sobre os pasos a seguir ás persoas que queiran sumarse á súa campaña. Para iso, ofrecen tanto un enderezo de correo electrónico coma un teléfono de contacto.