Abellá celebra con degustacións e moita música a súa Festa da Filloa

A asociación de veciños Os Labregos de Abellá, en colaboración co Concello de Frades, a Deputación da Coruña e a Mancomunidade de Ordes, organizou para este sábado a undécima edición da Festa da Filloa, na que non faltarán as degustacións gastronómicas nin as actuacións musicais.

A celebración, que terá lugar no pavillón municipal de Abellá, comezará ás 13.30 horas coa tradicional degustación de filloas e caldo galego.

A filloa de Lestedo estrea categoría e novos aliados cunha concorrida e emotiva edición

A xornada ao redor dun dos pratos máis característicos da gastronomía galega contará tamén cun variado acompañamento musical. Neste sentido, a música correrá a cargo do Dúo Acherizados, que se encargará da sesión vermú, mentres que pola tarde volverá actuar acompañado polo grupo de gaiteiros Son da Terriña, da parroquia de Galegos, e Disco Móbil Impacto.

Así mesmo, ao longo da xornada festiva haberá sorteos e xogos para os máis pequenos, e unha cantina atendida pola comisión de festas de Abellá.

Nesta nova edición da festa a organización espera atraer un ano máis centos de persoas para gozar do bo facer dos filloeiros e filloeiras da localidade.