Oito anos de loita pioneira e 112.500 avespas velutinas menos en Carballo

O Concello de Carballo foi pioneiro en Galicia ao poñer en marcha no ano 2017 a primeira campaña de trampeo da avespa velutina. Este 1 de marzo, coma todos os anos, o servizo municipal de control de pragas puxo en marcha a correspondente ao 2025, na que novamente contarán coa axuda da veciñanza en xeral e dos apicultores e apicultoras en particular. A campaña inclúe tamén accións de divulgación, como a realizada por Isidro Rodríguez no marco da MercaEscola.

Cabana, Dumbría e A Laracha comezan a loita contra a velutina

Desde a primeira campaña foron capturadas 112.562 avespas no municipio carballés. O ano de maior incidencia da praga foi o 2021, no que caeron nas trampas un total de 32.391 exemplares. Aínda que desde ese ano houbo un descenso, as cifras seguen a ser moi elevadas e no 2024 acadáronse as 17.203.

«Este ano nótase unha incidencia moito menor da presenza da avespa asiática, aínda que os expertos consideran que é unha situación conxuntural derivada da meteoroloxía, e que o peor está por vir», subliñan dende o Concello carballés. Polo momento, as capturas nas trampas que se colocaron nos últimos días de febreiro nas zonas verdes públicas «son moi escasas, pero xa empeza a habelas», engaden.

Detectan en Asturias una nueva velutina más agresiva: «Si no se erradica ya, llegará a Galicia»

Dende o Concello agradecen a implicación da cidadanía, «xa que cada ano contamos con máis de 200 voluntarios e voluntarias para loitar contra esta especie invasora». Neste sentido, lembran que as persoas interesadas poden achegarse ata as instalacións da empresa Plaguiber (rúa Brasil, número 27) para inscribirse e recoller, de balde, a trampa e o líquido atraente, do que levan distribuído 6.481 litros en cinco anos. Os participantes só teñen que comprometerse a informar periodicamente sobre as capturas que realicen e devolver as trampas ao remate da campaña.

O obxectivo son as raíñas

A actual campaña de trampeo no municipio carballés concentrarase entre os meses de marzo e maio, coincidindo coa aparición dos primeiros niños primarios, o que permite capturar ás raíñas e evitar a formación de futuros niños secundarios.

En canto aos niños que poidan ir aparecendo, lembran que os avisos deben realizarse a través do teléfono da Xunta de Galicia 012. A Consellería de Presidencia, Xustiza e Deportes e a Federación Galega de Municipios e Provincias asinaron, un ano máis, o convenio para a coordinación de actuacións no desenvolvemento do programa galego de vixilancia e control fronte á avespa asiática no ano 2025. O Concello de Carballo vén de adherirse a ese convenio para continuar coa loita.