Calceta, perruquería e películas de crimes: a vimiancesa Josefa Vilavedra cumpre 102 anos rodeada de once bisnetos

Josefa Vilavedra Torres, coñecida como Fefa, veciña do concello de Vimianzo, celebrou este martes o seu 102 cumpreanos. Ata o seu fogar achegáronse a alcaldesa, Mónica Rodríguez, e a concelleira de Benestar Social, María José Pose, para felicitala por esta data tan especial e facerlle entrega dun obsequio en nome da Corporación municipal.

Francisca Simil, una de las centenarias de A Pobra, arranca el año soplando las velas de su 103 aniversario

Fefa goza dunha envexable saúde que lle permite facer algunhas das cousas que lle apaixonan: calcetar, ver películas de crimes e programas "de cotilleo", ir á perruquería, ler novelas á hora da merenda, facer crucigramas e sopas de letras e, sobre todo, conversar.

Non tivo unha ocupación profesional pero dedicou toda a súa vida á familia, atendendo o fogar e criando sete fillos. A tristura chegou coa morte do primeiro, de corta idade, e o ano pasado coa doutra das fillas. Pero a ledicia refléxase no seu rostro cando se rodea dos seus trece netos e once bisnetos.

Con todos eles celebrará por todo o alto o seu 102 cumpreanos o vindeiro sábado cun xantar familiar, na casa na que vide coa súa filla Marité.

"Ten unha saúde envexable", di a alcaldesa sobre Fefa, quen, por certo, foi operada "moitas veces", segundo explica a súa filla. Unha delas, dun cancro nunha cella.

"Non se deita pola noite sen ler algo antes; eu vouna felicitar todos os anos, e parece que cada ano está mellor que o anterior", sinala Mónica Rodríguez.