#FalaConBlas: retoman as charlas co alcalde de Ames

O rexedor amesán atenderá nas súas redes sociais consultas cidadás en directo o derradeiro martes de cada mes

25 MAR 2025 6:00

O alcalde de Ames, Blas García, atenderá en directo, a través do seu perfil nas redes sociais Facebook (@blasgarcia.ames) e Instagram (@blasgarcia), as consultas dos cidadás que se poñan en contacto con el nestas plataformas.

Será o fundamento da segunda tempada do programa #FalaConBlas, co que o rexedor amesán quere achegarse á cidadanía para resolver as súas inquedanzas e coñecer de primeira man os seus comentarios sobre a actualidade no concello. Esta iniciativa xurdiu no ano 2021 coma parte dun proxecto dun grupo de alumnos do Máster en Comunicación Política daUniversidade de Santiago deCompostela (USC).

Nesta nova edición, o contido do #FalaConBlas poderá seguirse en directo nas redes sociais xa citadas e revisitarse en diferido tanto nesas plataformas coma no TikTok e na canle de YouTube do alcalde.

Hoxe mesmo terá lugar a primeira destas charlas, nunha emisión que dará comezo en torno ás 21:00 horas e na que Blas García comentará coa veciñanza sucesos acontecidos dende o último programa; coma a visita do xefe da área sanitaria de Santiago ao centro de saúde de Bertamiráns, as obras de humanización do centro do Milladoiro, as masivas manifestacións contra a pasteira que Altri quere instalar en Palas de Rei, as reclamacións pola gratuidade da autoestrada AP-9 ou a inseguridade na AC-544.

Sobre este programa, García remarcou que lle gusta «ser accesible e falar de todo con calquera» e que «a xente debería poder preguntarlle sobre calquera tema aos políticos que os representan», razóns polas que se preseta a participar nesta iniciativa.