Sedexpo fai de Silleda un escaparate do avance en seguridade e emerxencias

A terceira edición da Feira Internacional de Seguridade, Defensa e Emerxencias (Sedexpo), abriu onte as súas portas no recinto Feira Internacional de Galicia Abanca de Silleda, localidade pontevedresa que esta cita convertirá por uns días no principal escaparate galego dos últimos avances nestes sectores.

A xornada inaugural contou coa presenza de autoridades de rango autonómico, como o conselleiro de Presidencia, Xustiza e Deportes, Diego Calvo, e o seu homólogo do Mar, Alfonso Villares, quenes asistiron a un evento que xunta nun espazo expositivo de pouco máis de catro mil metros cadrados un total de 99 expositores con produtos de 387 firmas de 38 países. Estas cifras superan netamente ás de edicións anteriores desta feira.

Expositores de centos de firmas constatan o crecemento de Sedexpo

De xeito paralelo á mostra, no recinto silledense celebráronse dende primeira hora multitude de actividades, dende demostracións e simulacros a conferencias técnicas e obradoiros prácticos.

Unha delas foi o taller Fire Res Interface Azul, organizado pola Consellería do Medio Rural da Xunta de Galicia, que forma parte como socia de pleno dereito deste proxecto europeo cuxo obxectivo principal é conseguir unha estratexia integrada de xestión de incendios eficiente e eficaz. Este foro abordou no día de onte temas como o dos «pobos seguros» creados en Portugal contra o lume ou o traballo dos voluntarios das agrupacións de Protección Civil. Hoxe retomará a actividade cun simposio sobre os incendios forestais extremos.

Non foi a única xornada técnica dunha feira na que tamén se trataron o labor dos servizos de intelixencia e a súa evolución co paso do tempo, os procedementos a seguir ante inundacións e fenómenos meteorolóxicos adversos, a ciberseguridade ou o emprego de drons.

Ademais, celebráronse talleres prácticos, como o de soporte vital básico e desfibrilación externa semiautomática, organizado pola Fundación Pública Urxencias Sanitarias de Galicia-061.

Como acontece habitualmente, as demostracións e simulacros foron protagonistas desta feira e os asistentes puideron ver como se traballa a prevención activa do persoal aerotransportado ou prácticas extremas de alto estrés en tiro simulado. Así mesmo, no marco de Sedexpo houbo exhibicións de sistemas de ciberseguridade, drons, maquinaria e compostos de fibra que absorben derrames de hidrocarburos e derivados químicos tanto na auga como en terra.