Padrón e Vedra únense pola camelia nunha exitosa mostra floral

Hai dous concellos no val do Ulla unidos pola paixón pola camelia. Padrón e Vedra escenificaron esta pasada fin de semana o seu irmandamento ao redor desta flor nunha nova edición, a novena, da Exposición da Camelia e do Bonsái; unha mostra floral que reuniu setenta e dous expositores no recinto do Convento do Carme e que se consolida como unha das máis destacadas do calendario galego.

O premio para a mellor flor de orixe galega foi para un cultivador de Fene, Eusebio López, dentro dun certame no que tamén se entregaron distincións aos mellores expositores en varias categorías, divididas en función da especie de camelia empregada.

Vedra afianza o seu nexo coa camelia nunhas xornadas ateigadas de xente

No marco desta xornada tamén se celebrou un obradoiro de elaboración de sombreiros sancosmeiros e tivo lugar unha demostración de arte floral con camelias a cargo da Floraría Chorima. Ademais, xa o domingo, os asistentes á cita puideron participar en talleres de cerámica, nunha visita guiada á exposición e nunha actividade formativa en poda e coidado de froiteiras.

Con todo, a nivel institucional, o máis relevante do día foi o irmandamento de Padrón e Vedra coa sinatura por parte do alcalde vedrés, Carlos Martínez Carrillo, no libro de honra do Convento, dando conta dos lazos que unen ambos os dous municipios das ribeiras do Ulla.

A Exposición da Camelia e do Bonsái contou tamén cunha destacada presenza de veciños e veciñas procedentes de Vedra, que se desprazaron ata Padrón para gozar da xornada.