Críticas do BNG pola perda do nutricionista en Negreira e Santa Comba

Unha praza itinerante de nutricionista, entre Negreira e Santa Comba, que foi suprimida e xa non existe. É o reclamo que o grupo do BNG elevará ao Parlamento de Galicia para tratar de recuperar esta consulta especializada na atención sanitaria ofrecida nestes dous concellos, cuxos centros de saúde tamén serven de referencia para a poboación de municipios próximos como son A Baña e Mazaricos.

De acordo co exposto onte pola deputada nacionalista Iria Carreira, o recorte deste posto de traballo ten efectos perniciosos sobre a atención sanitaria na zona e supón tamén unha «sobrecarga de traballo» para os profesionais dos centros de saúde que teñen que asumir a poboación derivada destes catro concellos.

Na actualidade, os veciños e veciñas de Mazaricos e Santa Comba deben desprazarse ata Muros para asistir a esta consulta, mentres que os da Baña e Negreira fano ata Santiago de Compostela, concretamente ao centro de saúde de Fontiñas.

Santa Comba pídelle ao Sergas volver ter servizo de nutricionista

Algo que, a ollos da parlamentaria do BNG, «afonda na desigualdade xeográfica da sanidade pública» e responde á estratexia de «desmantelamento» da atención primaria que o Goberno galego vén executando, na súa opinión, dende hai anos.

«A fenda territorial é enorme e a distancia que teñen que percorrer moi grande. Por iso esiximos a inmediata restitución desta profesional», manifestou Carreira, que insistiu en que a supresión deste tipo de prazas significa «darlle ás costas á calidade de vida da veciñanza e, en especial, á de concellos como os afectados».

Veciños de Negreira e doutros municipios da zona participaron o pasado 13 de marzo nunha concentración diante do centro de saúde nicrariense para denunciar este feito e demandar solucións.