Ames e a Xunta estudan como mellorar a liña de bus de Bertamiráns a Santiago

A extinción da antiga liña P2 de autobús urbano de Santiago de Compostela deixou as parroquias amesás de Biduído, Bugallido e Ortoño orfas dunha conexión de transporte público eficiente coa capital galega. Coa fin de paliar esta situación, a Xunta de Galicia e o Concello de Ames acordaron no 2022 a creación dun novo servizo de interese municipal (SIMU), que agora ambas as dúas institucións buscan como perfeccionar de cara a prestaren un mellor servizo.

Así, a directora xeral de Mobilidade do Executivo autonómico, Judit Fontela; o alcalde de Ames, Blas García; e o presidente da empresa concesionaria participaron onte nun encontro a tres bandas para estudar o estado desta liña e abordar posibles melloras.

García propuxo que o convenio inclúa novas paradas en lugares de interese de Compostela, como o Hospital Clínico ou o Campus Sur da USC, así como nos lugares de Fraiz e A Moniña, na parroquia de Biduído, á vez que defendeu que se deben resolver as «numerosas incidencias» trasladadas por parte da veciñanza que motivaron esta reunión e evitar «duplicidades» coa liña de autobús provinte da localidade de Extramundi (Padrón).

Ames, Xunta y Monbus se reunirán para evaluar el transporte en el rural

Porén, os datos do estudo de seguimento elaborado pola Xunta de Galicia a respecto deste SIMU indican que a adxudicataria cumpriu adecuadamente co 99% dos servizos programados nos últimos catorce meses, o período de referencia deste informe.

Nese documento tamén se constata que catro de cada cinco autobuses foron puntuais e que só o 7% se moveu fóra das marxes horarias fixadas no contrato.

Ademais, dende a Administración autonómica apuntaron que a demanda da liña é escasa, posto que apenas rexistrou 4.100 usuarios no tempo que foi sometida a análise, cunha media de 1,3 viaxeiros en cada servizo. Este SIMU parte da rúa Alcalde Lorenzo de Bertamiráns e, dende alí, atravesa as parroquias de Ortoño, Biduído e Bugallido ata chegar á estación intermodal de Santiago, cunha frecuencia de catorce servizos diarios de luns a sábado e de doce os domingos. Os usuarios da liña teñen acceso ás mesmas bonificacións que o resto de viaxeiros do transporte metropolitano operado pola Xunta.

Como resultado da xuntanza de onte, o Goberno galego comprométese a estudar as achegas que poida facer o Executivo municipal, que asegurou que trasladará proximamente unha proposta de mellora do servizo á administración responsable.