Os vehículos de combustión acaparan as miradas na estrea do salón da Estrada

Cada vez son máis os fabricantes de coches que optan por motorizacións híbridas ou eléctricas para os seus modelos, aínda que en Galicia e en España os vehículos de combustión seguen a ser os máis demandados polos compradores. Así o demostrou a apertura dunha nova edición, a novena, do Salón do Vehículo de Ocasión Estradense, que se celebra no Recinto Feiral da Estrada e que abriu as súas portas coa maioría de ollos postos sobre os automóbiles propulsados por gasolina e diésel.

Esta cita xuntará na vila pontevedresa ata o vindeiro domingo a milleiros de interesados en adquirir algún dos centos de vehículos expostos e para os que se ofrecen importantes descontos respecto dos seus prezos habituais, así como prazos de garantía de ata cinco anos.

A Estrada convértese na capital do coche de ocasión

A selección de vehículos expostos varía dende coches de só uns miles de euros ata deportivos de coleccionismo e series limitadas coma o Chevrolet Corvette Carbón, do que só se fabricaron seiscentas cincuenta unidades en todo o mundo.

A entrada para o salón é válida para os tres días que dura a cita, á que se pode acceder en horario ininterrompido de once a vinte horas ata o domingo.

O director xeral de Comercio e Consumo da Xunta de Galicia, Gabriel Alén Castro, participou no acto inaugural xunto ao alcalde Gonzalo Louzao e máis autoridades locais e provinciais.