Sarandón exalta hoxe unha vez máis as virtudes do Viño da Ulla

A parroquia vedresa de San Miguel de Sarandón será hoxe unha vez máis o lugar dende onde se glosen as virtudes do viño da Ulla, unha subzona recoñecida dende hai vintecinco anos como parte da Denominación de Orixe Protexida (DOP) Rías Baixas.

A XLIII Festa de Exaltación do Viño da Ulla celebrarase despois dun sábado marcado pola celebración dunha cata concurso e unha serie de actividades complementarias coma rutas motorizadas, catas comentadas e actuacións musicais. Entre elas, a de grupos folk de concellos da contorna e os concertos dos John Deeres e de The Rapants, plato forte da noite do sábado, que congregaron a un número importante de xente no recinto da festa.

Catas guiadas, rutas e música para presumir do viño da Ulla

Para hoxe, ademais da tradicional mostra cos viños desta subzona e outros da mesma denominación de orixe, está prevista a celebración dun acto institucional que constará do saúdo do alcalde de Vedra, Carlos Martínez Carrillo; da lectura do pregón a cargo daconselleira do Medio Rural, María José Gómez; do nomeamento dos novos membros da Orde de Amigos do Viño da Ulla e da entrega de premios da cata concurso de onte.

Ademais, a festa continuará co concerto da Banda de Santa Cruz de Ribadulla e as actuacións de charangas e agrupacións tradicionais, preludio dunha verbena vespertina da man da orquestra París de Noia.