A Deputación da Coruña apoia o labor de 76 entidades sociais con 1,5 millóns de euros

A Deputación da Coruña destina este ano 1,5 millóns de euros para apoiar as entidades sociais sen ánimo de lucro da provincia no mantemento dos seus centros e de programas sociosanitarios e terapéuticos dos que se benefician centos de persoas da provincia con discapacidade ou enfermidades crónicas.  

A concesión destas liñas de subvencións vén de publicarse no Boletín Oficial da Provincia (BOP) o pasado xoves, 10 de abril. Son un total de 76 axudas, que oscilan entre os 1.000 e os 54.800 euros. 

O PEL-Concellos crea máis de 400 empregos na provincia

Un total de 44 asociacións benefícianse este ano dun millón de euros en axudas da Deputación para o funcionamento de centros, que inclúen residencias, centros de día, ocupacionais ou de atención á infancia, entre outros.  

Entre elas destacan o centro Ricardo Baró de Aspronaga (Oleiros) para persoas con discapacidade intelectual, o centro de rehabilitación psicosocial e inserción laboral para persoas con con trastorno mental severo e crónico A Creba de Noia, os apartamentos tutelados O teu fogar, o teu futuro, de Down Coruña, o centro de día de Adaceco, as asociacións de familiares de enfermos de Alzheimer da Coruña (AFACO) e Ferrol (AFAL), a unidade de día da Asociación Ferrolá de Drogodepedencias (ASFEDRO) ou a asociación Íntegro de persoas con diversidade funcional da Costa da Morte.  

Na liña para programas sociosanitarios, a Deputación destina outros 500.000 euros para apoiar 32 entidades na súa oferta de servizos, programas ou activades de carácter sociosanitario dirixidas a persoas enfermas -xeralmente crónicas- que polas súas especiais características poden beneficiarse da atención simultánea e sinérxica dos servizos sanitarios e sociais para aumentar a súa autonomía, paliar as súas limitacións, favorecer a rehabilitación e a súa integración social.  

Algunhas patoloxías coas que traballan as entidades financiadas son a saúde mental, a anorexia e a bulimia, o cancro, a esclerose múltiple, a ELA, o alzheimer, a fibrose quística, o párkinson ou as enfermidades reumáticas, entre outras. 

O presidente da Deputación da Coruña, Valentín González Formoso, destacou a importancia destas axudas para apoiar o funcionamento de entidades sociais que “contribúen a mellorar a vida de miles de persoas especialmente vulnerables e as súas familias” e subliñou “o traballo fundamental” destas asociacións.

“Xa sexa no ámbito da exclusión social, da discapacidade, da loita contra a pobreza ou na atención á infancia e ás persoas maiores, estas organizacións son nun piar esencial para construír unha sociedade máis equitativa e inclusiva”, afirmou. 

Este ano, a Deputación da Coruña destinará 4,5 millóns de euros en diferentes liñas de axudas para apoiar a actividade de máis de 270 entidades sociais da provincia a través de diferentes programas que financian actividades, gastos de funcionamento e persoal, melloras ou ampliacións de sedes e dotación de vehículos para o transporte de persoas con necesidades especiais.