Ames promove boas prácticas para desfacerse dos restos de poda cunha campaña informativa

Co obxectivo de mellorar a xestión dos residuos vexetais e evitar condutas incorrectas que poidan xerar problemas ambientais ou de seguridade, o Concello de Ames, a través da Concellaría de Xestión do Medio Natural e Atención ao Rural, vén de poñer en marcha a campaña ‘Como desfacerse dos restos da poda?’.

Esta iniciativa busca informar e concienciar á veciñanza sobre os métodos axeitados para o tratamento destes restos, que adoitan acumularse de forma indebida ao carón dos colectores de lixo, unha práctica que está xerando preocupacións ao ser cada vez máis frecuente. «Estamos atopando moitos restos de poda dentro e ao lado dos contedores de lixo, por iso decidimos publicar esta campaña de información», sinalou o concelleiro de Xestión do Medio Natural e Atención ao Rural, Javier Antelo.

 Entre as recomendacións da campaña, destaca que os restos de poda deben introducirse en bolsas e depositarse dentro do colector do orgánico, sempre sen superar dous terzos da súa capacidade. Como alternativa, tamén se poden deixar ao lado colector, sempre en bolsas de lixo ben pechadas.

Ademais destas opcións, a campaña lembra outras vías como a compostaxe doméstica, a entrega a un xestor autorizado ou a queima, que debe ser comunicada previamente a través da plataforma queimasweb.xunta.gal.

«Antes había depósitos de poda, pero na actualidade, a lei non permite manter ditos depósitos polo perigo de incendio que supón, por iso a través desta campaña informamos sobre as diferentes opcións que existen para desfacerse dos restos de poda», concluíu Javier Antelo.

Dende a Concellaría tamén destacaron a importancia dunha poda ben feita, realizada no momento axeitado e con criterio técnico, algo que non só favorece á saúde das plantas senón que evita a atracción de pragas e mellora a súa resistencia a condicións adversas.