De Carballo a Malawi para axudar ás estudantes dunha residencia

Voluntarios e voluntarias da Asociación Operación Pangono Pangono desprazáronse esta semana dende Carballo a Malawi (África) para facer a entrega oficial da MiniVan_Area49, un minibús destinado á residencia de mozas estudantes Amai Maria, situada en Lilongwe, capital do pequeno país africano.

O minibus foi adquirido grazas ao proxecto #MiniVan_Area49, que recolle o nome do barrio onde se atopa a residencia de estudantes. «Vai permitir que as mozas estudantes da residencia Amai María poidan desprazarse cada día aos seus centros de estudos repartidos pola capital do país», afirma Ricardo Baamonde, veciño de Malpica e presidente da Asociación Operación Pangono Pangono. Un medio que, engade, permitirá a estas estudantes dispoñer dun medio de transporte propio.

Solidariedade dende Carballo para ofrecer transporte seguro a mozas de Malawi para que poidan estudar

Esta acción solidaria é o froito do esforzo e a colaboración de varias empresas e persoas da comarca de Bergantiños que fixeron posible a consecución deste proxecto. Nómadas Motorhome, con sede en Carballo, é a principal patrocinadora do proxecto, mentres que a empresa pontecesana Axuste Gráfico, encargouse da rotulación do minibús.

E a promotora do proxecto, a Asociación Operación Pangono Pangono foi quen se encargou de facer a entrega da MiniVan ás Misioneiras de María Mediadora, administradoras da xestión da residencia.

O comercio de Carballo recada 1.715 € para axudar a Paiporta

O minibús vai permitir ademais ás misioneiras o desprazamento entre as distintas instalacións das que dispoñen repartidas por Malawi, xa que ademais da residencia de estudantes, as misioneiras administran dous hospitais rurais e un orfanato.

Rutas Nómadas Solidarias

Oproxecto púxose en marcha hai un ano, logo de que Lucía Figueiras e Jesús García, xerentes de Nómadas Motorhome, promovesen nos anos 2017 e 2018 as Rutas Nómadas Solidarias, coas que recadaron fondos para dotar de instalacións fotovoltaicas e bombeos solares a varios hospitais, orfanatos e residencias de estudantes.

Entrega de ordenadores

Os voluntarios e voluntarias da Operación Pangono Pangono (que toma o nome da expresión «pouco a pouco» en chichewa, lingua oficial de Malawi,xunto co inglés), aproveitaron o desprazamento ao país africano para facer tamén entrega de varios ordenadores adquiridos grazas ás achegas de membros e simpatizantes da asociación por medio dun crowdfunding posto en marcha unhas semanas atrás.

Durante a semana de estadía no país realizaron tamén varios mantementos nas instalacións eléctricas fotovoltaicas instaladas en anteriores visitas ao país. «Comprobamos que en moitas destas instalacións é preciso a substitución de varias ou de todas as baterías debido aos continuos cortes na subministración eléctrica que provocan o seu rápido deterioro», subliña Ricardo Baamonde.

Deficiente submistro eléctrico

Constataron asemade que, «lamentablemente, a situación económica e social do país tampouco mellorou nos últimos anos e que seguen a ser continuos os cortes na subministración eléctrica polo que os equipamentos solares fotovoltaicos continúan a ser imprescindibles nas escolas, hospitais e residencias onde se atopan instalados», subliña.

A comitiva desprazada a Malawi emprenderá este domingo o camiño de regreso a Galicia coa satisfacción de poder axudar a quenes máis o precisan e coa intención de seguir colaborando no futuro.