O ciclo Abril de Cine péchase coa proxección de catro curtas no Milladoiro

Mañá martes terá lugar a última xornada da quinta edición do ciclo de cinema Abril de Cine, unha iniciativa para achegar á veciñanza amesá diversas propostas do cinema galego actual. Nesta derradeira sesión, que terá lugar ás 20.00 horas no auditorio do Milladoiro, proxectaranse catro curtametraxes co xénero documental e o desarraigamento como nexos en común.

Por un lado, proxectarase Platónico, platónica, de Xacío Baño, unha curta na que se fai unha reflexión profunda entre o amor e a intelixencia artificial.

Despois será a quenda de Noites de prata de Soraya Antelo, un proxecto finalista nos Premios Mestre Mateo do 2024 que narra a historia de Lola, unha cantante de boleros que abandoa Galicia polas terras do Río da Prata.

A terceira das curtas será Carracedo de Manu Lucas Mariño, un documental que pon en valor a figura do artesán galego Sito Carracedo no seu traballo de recuperación do patrimonio cultural galego.

Para finalizar, a última das curtas que se proxectará será Pechar caixas, abrir caixas de Hugo Amoedo, un filme no que se narra a historia da volta a Galicia do escritor Xavier Queipo despois de máis de 30 anos en Bruxelas.