A Laracha dedica 731.000 € do remanente a investimentos e melloras no patrimonio

A Corporación da Laracha aprobou o suplemento de crédito que permitirá incorporar aos orzamentos deste ano 731.491,06 euros, procedentes do remanente líquido de tesourería da anualidade 2024, para o financiamento de gastos considerados urxentes e inaprazables, todos eles de interese xeral para a cidadanía.

O proxecto de maior importe alcanza os 215.000 euros, e ten como obxecto a reforma da cuberta do complexo deportivo da piscina municipal para mellorar a impermeabilización. O alcalde, José Manuel López, informou de que «é unha primeira parte, a segunda fase será a futura instalación dun sistema de produción de enerxía fotovoltaica para a que xa hai solicitada unha subvención. Despois das obras, sacarase a nova licitación para a xestión e explotación das instalacións».

A Laracha renova a estrada de Cerceda que vertebra boa parte do concello

Outra parte importante dos fondos, máis de 200.000 euros, empregaranse na mellora da rede viaria municipal, con proxectos tanto nos núcleos urbanos como nas zonas rurais para facilitar o tránsito de vehículos e peóns, favorecer as comunicacións, reforzar a seguridade viaria mediante a sinalización horizontal e vertical e actuacións de mantemento na iluminación pública.

A Laracha acadará un autoconsumo do 56,7% en seis edificios públicos

Tamén quedan consignados os fondos necesarios para actuacións de mellora da eficiencia enerxética e da accesibilidade en instalacións nas que se desenvolven actividades culturais, así como para a reapertura do centro social de Paiosaco, cuxo contrato de explotación vai ser licitado en próximas datas.

Nos eidos patrimonial e turístico, dispoñer do remanente permitirá ao Concello levar a cabo traballos de sinalización na Ribeira de San Fins e no Castro de Montes Claros, así como instalar unha nova pasarela nunha das entradas á praia de Caión para mellorar a accesibilidade.