Máis de 200 nenos e nenas de Zas debuxan o escritor Enrique Labarta Pose no Día do Libro

Máis de 200 nenos e nenas de Educación Infanil e Primaria do CPI de Zas e do CEIP Labarta Pose asistiron este mércores ao contacontos O poeta da terra, de Polo Correo do Vento.

Foi unha actividade organizada polo Concello con motivo do Día Internacional do Libro, que se conmemora cada 23 de abril, e que se engloba dentro da programación especial dos 100 anos do pasamento de Enrique Labarta Pose.

O espectáculo dividiuse en dúas partes. Na primeira, os membros de Polo Correo do Vento encargáronse de contarlle á rapazada aqueles aspectos máis importantes da vida e obra de

Labarta, ao mesmo tempo que realizaban unha caricatura do seu polifacético veciño. E na segunda parte, os alumnos fixeron os seus propios debuxos de Labarta.

O alcalde de Zas, Manuel Muíño, e a concelleira de Educación, Pilar García, quixeron achegarse ata os centros de ensino para presentarlles este espectáculo e convidalos a

mergullarse no mundo da lectura.

Este contacontos naceu ao mesmo tempo que o primeiro libro infantil dedicado a Labarta e que tamén leva por título O poeta da terra. O Concello de Zas, xunto con Lela Edicións, publicou este libro en outubro do ano pasado e xa se repartiron máis de 500 exemplares entre o alumnado do municipio e nos centros de ensino e bibliotecas municipais de toda a Costa

da Morte.

Esta é unha nova acción do Goberno local para dar a coñecer e poñer en valor a figura de Enrique Labarta Pose e conseguir que se lle dedique o Día das Letras Galegas.