A Baña repartirá unha trintena de composteiros e creará dous punto de compostaxe comunitaria

O Concello da Baña fará entrega de 30 novos composteiros individuais, que se suman aos 170 xa repartidos noutras edicións, e creará dous puntos de compostaxe comunitaria no centro urbano de San Vicenzo. Unha iniciativa que como destacan dende o municipio reforza o seu compromiso cunha xestión de residuos máis sostible e respetuosa co medio ambiente.

O obxectivo da iniciativa é promover a separación e reciclaxe en orixe dos biorresiduos, facilitando a elaboración de compost natural tanto nas vivendas con horta ou xardín como nas zonas urbanas onde se instalarán os composteiros comunitarios.

O alcalde, José Antonio Pereira Gil, fixo un chamamento á participación veciñal e anunciou que nos vindeiros meses organizaranse charlas informativas e obradoiros prácticos para fomentar o uso axeitado dos composteiros.

As persoas interesadas en participar nesta nova entrega poden solicitar o seu composteiro doméstico na Casa do Concello ou a través do teléfono 981 886 501, ata esgotar existencias.