Un foro xuntará produtores, restaurantes e firmas de catering de Terras de Santiago

Dotar os restaurantes dunha materia prima ecolóxica, de inmellorable calidade e de quilómetro cero que lles permita dar un salto adiante á nosa gastronomía e convertela nun dos eixos principais da promoción turística do xeodestino Terras de Santiago, xunto aos seus atractivos paisaxísticos, culturais, naturais e patrimoniais, é o obxectivo da xornada O fío verde, primeira acción de promoción turística de dito ámbito, que terá lugar a próxima semana en Compostela.

Terras de Santiago: auga e estrelas para os turistas

O fío verde reunirá unha vintena de produtores locais de horta ecolóxica, leite, queixo, pasta fresca e distintos produtos cárnicos con restauradores e empresas de catering que se atopan na área de influencia do xeodestino coa intención de que poidan incorporalos á súa lista de provedores.

Trátase de emprendedores e emprendedoras dos municipios que integran o xeodestino: Ames, A Baña, Boqueixón, Brión, Negreira, Padrón, Rois, Santa Comba, Teo, Val do Dubra e Vedra.

«Levamos a terra no noso nome, por algo somos o xeodestino Terras de Santiago. Unha terra vinculada non só a nós, senón tamén aos nosos devanceiros. E con esta iniciativa estamos intentando recuperar uns sabores que parecían esquecidos, aqueles dos nosos avós e avoas, porque estamos convencidos de que a súa frescura, a súa autenticidade e a súa calidade constitúen un atractivo innegable e unha das fortalezas da nosa proposta turística», explican dende a organización.

A xornada está organizada polo xeodestino Terras de Santiago en colaboración co GDR Terras de Compostela e Slow Food Compostela. Terá lugar a próxima semana nun establecemento hostaleiro compostelán e asistirán tamén edís de Turismo dos once municipios do xeodestino.