Vila de Cruces elixe cartel para o XXXI Festival de Bandas

A cruceña Esther Carballal é a gañadora do concurso de carteis para o XXXI Festival de Bandas de Música de Galicia, que se celebrará o sábado 24 de maio no marco da Festa Gastronómica do Galo de Curral.

Carballal, que, tras vivir en París e Valencia, regresou a súa terra natal, ao fogar dos seus avós, explica que o cartel representa "como a música ten o poder de axudar a evadirnos e facer voar a nosa imaxinación".

O certame convocouse en tres categorías: de 0 a 16 anos gañou Thomas Abraham Moreno, premiado con 75 euros; de 17 a 64 anos impúxose Esther Carballal, que recibiu 150 euros e será agasallada co cartel enmarcado, e na modalidade de maiores de 65 anos venceu María Rosa Pampín, que obtivo un premio de 75 euros.