Arzúa converterá a casa da cultura nun espazo eficiente e sostible

O Concello de Arzúa acaba de sacar a licitación unha actuación de mellora na casa da cultura, cun orzamento de máis de 135.000 euros, co obxectivo de facer un edificio máis cómodo, moderno e eficiente.

"A casa da cultura é un espazo referencial para toda a veciñanza de Arzúa. Con estas obras melloraremos a súa funcionalidade e farémola máis eficiente e sostible. Apostamos por unha Arzúa que coida o que ten e adapta os seus espazos públicos aos retos do século XXI", explicou a concelleira de Acción Urbana, Begoña Balado.

As actuacións centraranse en tres ámbitos principais. Por unha banda, mellorarase o illamento térmico das paredes interiores e, por outra, renovarase todo o sistema de iluminación, instalando luminarias led de baixo consumo e un sistema intelixente que axuste a súa intensidade segundo o uso. Ademais, substituirase a actual caldeira de gasóleo por unha caldeira de pellets.

"Investir en eficiencia enerxética é beneficioso tanto para a veciñanza como para o Planeta. Por un lado, conseguimos edificios que diminúen a súa pegada ecolóxica e, por outro, a longo prazo reducimos os custos de mantemento dos espazos xestionados polo Concello", sinalou o alcalde, Xoán Xesús Carril.