Organizan un programa grupal para a mellora do sono en Ames

O departamento de Promoción da Saúde do Concello de Ames organiza un programa grupal para a mellora da calidade do sono, dirixido a persoas que teñan dificultades para conciliar o sono ou que desexen mellorar a calidade do seu descanso.

Ames activa o primeiro plan de saúde mental e crea a Unidade de Necesidades Emocionais

O programa comezará o vindeiro luns día 19 de maio e está composto por un total de sete sesións de hora e media de duración nas que se ofrecerán diferentes ferramentas prácticas e de apoio mutuo para que os participantes melloren a calidade do seu sono.

A formación desenvolverase os luns, en horario de 17.00 a 18.30 horas, no Pazo da Peregrina. Hai 20 prazas dispoñibles, podendo realizarse a inscrición a través da web municipal. Terán prioridade as persoas empadroadas no concello de Ames. No caso de recibir un número de inscricións superior ás prazas ofertadas, estas adxudicaranse por sorteo.

Este programa enmárcase dentro do I Plan de Benestar Emocional e Saúde Mental do Concello de Ames, posto en marcha a finais de 2024, unha iniciativa pioneira que ten como obxectivo previr, promover e atender a saúde mental e o benestar emocional da veciñanza amesá. Deste xeito, con esta iniciativa preténdese atender as necesidades reais da poboación e mellorar así o seu benestar mental e a calidade de vida.