Camariñas volve ter conexión a Internet tras dez días sen servizo

A compañía de telefonía R Cable conseguiu restablecer na tarde desde venres o acceso a Internet nas zonas do territorio municipal de Camariñas que permaneceron dez días sen ese servizo.

O restablecemento prodúxose en torno ás oito da tarde do venres. Ese mesmo día, a alcaldesa, Sandra Insua, enviáralle unha reclamación á compañía urxíndoa a restablecer o servizo de acceso a Internet en todas as zonas afectadas do municipio á maior brevidade.

Na súa carta, a rexedora manifestaba a súa «enérxica protesta» debido á interrupción do servizo de acceso a Internet que afectou a varias zonas do concello desde o martes 29 de abril, e que ocasionou «graves prexuízos tanto aos cidadáns particulares como ao funcionamento de empresas e servizos esenciais». Esta incidencia xa foi comunicada á empresa en reiteradas ocasións, solicitando unha solución urxente.

Insua advertía que a situación era especialmente preocupante «dado que se prolonga xa durante varios días sen que, ata o momento, se teña restablecido o servizo nin se nos teña proporcionado unha explicación satisfactoria nin un prazo estimado para a súa resolución», e pedía a R Cable que restablecese o servizo, informase das causas da súa interrupción e considerase as compensacións pertinentes aos afectados.