Nenos e maiores da Baña gozan da Festa dos Maios e dun xantar veciñal

A localidade da Baña viviu este domingo unha xornada marcada pola cor, a natureza e a tradición coa celebración da súa Festa dos Maios, unha cita cultural que convocou a veciñanza ao redor dunha das celebracións máis simbólicas da primavera en Galicia.

A Baña activa un plan de vivenda para aumentar a oferta de alugueiros

A iniciativa foi da concellería de Acción Social, Cultural e Servizos á Cidadanía, que dirixe Mónica González, quen estivo presente e participou activamente xunto á veciñanza. Á cita asistiron o alcalde, José Antonio Pereira, e a concelleira de Turismo, Ana Pensado.

A programación deu comezo cun obradoiro participativo de elaboración de maios dirixido polo artista Oli Xiráldez, no que moitas persoas, nenos e maiores, aprenderon a crear estruturas florais con elementos naturais, recuperando así unha expresión artística tradicional moi vencellada á identidade cultural galega.

A cativada gozou coa busca das cañas e das flores e descubrindo a montaxe en cada un dos seus pasos, ao tempo que os maiores uniron forzas para completar un maio ben fermoso que loce xa na praza consistorial.

Debido á inestabilidade meteorolóxica, o xantar veciñal trasladouse ao centro social, onde o grupo deu boa conta tanto dos aperitivos aportados polo Concello como da comida que moitos achegaron da casa. Pola tarde, o público gozou do espectáculo Os Monifates, no que Alberto Millán e Xosé Piñeiro ofreceron unha función de marionetas danzantes acompañada de música en directo, que fixo as delicias de cativos e de maiores.