Ames acolle unha charla sobre o novo regulamento de estranxeiría

O Concello de Ames, a través da Concellaría de Benestar Social, colabora na organización da charla informativa para persoas migrantes sobre o novo regulamento de estranxeiría, unha actividade que se vai impartir o vindeiro martes 20 de maio, a partir das 10.00 horas, na Casa da Cultura do Milladoiro. Esta charla está financiada polo Ministerio de Política Territorial do Goberno de España, a través do Plan de Recuperación, Transformación e Resiliencia, e conta tamén coa colaboración da Federación Española de Municipios y Provincias.

A charla comezará ás 10.00 horas coa presentación da mesma, á que seguirá unha actividade informativa sobre o novo regulamento de estranxeiría que impartira o xefe da Oficina de Estranxeiría da Coruña, Julio Simón. A partir das 12.00 horas ofrecerase asesoramento en trámites e xestións habituais na Administración electrónica; e ás 12.30 horas abordarase a tramitación do certificado dixital ou cl@ve permanente con informáticos da Subdelegación do Goberno.

Para participar nesta actividade ofértanse cincuenta prazas (25 para persoal técnico e 25 para público en xeral). Para inscribirse hai que enviar un correo electrónico a servizos_sociaismilla@concellodeames.gal e as inscrición faranse por rigorosa orde de chegada das solicitudes. A data límite para inscribirse é este venres 16 de maio.