Ames lanza unha liña de axudas para entidades sociais dotada con 60.000 euros

O Concello de Ames ten aberta ata o nove de xuño a convocatoria de subvencións a entidades de iniciativa social sen ánimo de lucro para a promoción de actividades complementarias aos servizos sociais comunitarios e inclusión social que favorezan a inclusión social, a saúde pública ou a formación laboral.

Ao igual que en 2024, a contía total volve acadar os 60.000 euros. A tramitación para solicitar estas axudas debe facerse a través da sede electrónica do Concello de Ames.

Os obxectivos son a promoción da inclusión social de colectivos con dificultades de inserción; a instauración de programas de base comunitaria que desenvolvan accións preventivas; a intervención e o seguimento de persoas en risco de exclusión social; a realización de xornadas, charlas e divulgación dos efectos de determinadas enfermidades e adiccións ou a formación básica e laboral adaptada ás necesidades de persoas con diversidade funcional.

Cada entidade poderá optar a unha axuda máxima de 7.500 euros por proxecto de actuación, cun máximo de 3 propostas.

A convocatoria divídese en 3 liñas subvencionables, imputando 40.000 euros á de proxectos de inclusión social ou de convivencia; 5.000 euros á de xornadas, charlas e, en xeral, divulgación dos efectos de determinadas enfermidades, adiccións ou outras problemáticas de índole sanitario; e 15.000 euros á de actuacións destinadas a adquirir capacitación persoal, formación básica e de tipo laboral específica.

Poderán optar a estas subvencións as entidades de iniciativa social sen ánimo de lucro legalmente constituídas, que realicen actividades complementarias aos servizos sociais comunitarios, e que desenvolvan a súa actuación, entre outros ámbitos, en Ames.