A actuación de Antía Muíño pechará en Padrón o Letreseo

O vindeiro venres 23 de maio o Museo Camilo José Cela de Iria Flavia, en Padrón, acollerá a actuación de Antía Muíño, que servirá como peche do programa Letreseo, organizado pola Fundación Camilo José Cela e que este ano celebra unha edición especial, xa que se cumpre o trixésimo aniversario da concesión do Premio Cervantes ao autor padronés.

El legado de Cela revive en Padrón por el 30 aniversario de su Premio Cervantes

Antía Muíño é unha das revelacións da nova canción galega. Con Carta Aberta, o seu álbum de debut, alcanzou os case 2 millóns de reproducións e foi escollida embaixadora de Spotify España na súa playlist EQUAL.

O seu rexistro móvese entre o jazz-pop, a canción alternativa de autora e a música tradicional, unha viaxe entre estilos perfectamente guiada pola súa máxica voz. Na súa aínda curta carreira, actuou en festivais tan diversos como o Jazzaldia (Donosti), Veranos de la Villa (Madrid) ou Os Xoves de Códax (Cambados).

En directo, Antía Muíño acompaña a súa voz ás veces de guitarra clásica e ás veces de pandeireta, intercalando a intimidade e o virtuosismo das súas autorías coa potencia da percusión e o canto tradicional. Completan o cuarteto Miguel Arribas ao saxo e o teclado, Ton Risco ás percusións e Yudit Almeida ao contrabaixo.

Neste concerto especial do Letreseo suma novo repertorio ás aclamadas cancións de Carta Aberta, como os seus máis recentes sinxelos e algunhas novas achegas da tradición oral. O concerto será ás 20.00 horas e as entradas poden adquirirse a través de entradium.com.