Elaboran un plan para promover o emprendemento en 32 concellos da área de Santiago

O presidente da Deputación da Coruña, Valentín González Formoso, e a presidenta da Cámara Oficial de Comercio, Industria, Servizos e Navegación de Santiago de Compostela, María Pais, asinaron este martes un convenio de colaboración para o finacionamento do proxecto Fomento do emprendemento e a actividade empresarial da provincia, no marco do Plan de Emprego Local.

O ámbito de actuación deste convenio esténdese a unha trintena de concellos da comarca de Santiago: A Baña, Ames, A Pobra, Arzúa, Boimorto, Boiro, Boqueixón, Brión, Carnota, Dodro, Lousame, Mazaricos, Melide, Muros, Negreira, Noia, O Pino, Outes, Padrón, Porto do Son, Rianxo, Ribeira, Rois, Santa Comba, Santiago, Santiso, Sobrado, Teo, Touro, Toques, Vedra e Vilasantar.

Esta iniciativa supón un investimento de 69.375 euros, dos que a Deputación achegará o 80% (55.500 euros) e pretende apoiar a posta en marcha de novos negocios na comarca de Santiago para crear emprego de calidade, xerar riqueza e lograr un maior desenvolvemento socioeconómico que reverta en toda a provincia. Deste xeito, ten como fin contribuír á creación e consolidación de empresas, fomentar o autoemprego e proporcionar axuda para que mozos, sobre todo do rural, poidan desenvolverse na súa terra.

"Esta alianza coa Cámara de Comercio de Santiago supón un paso máis na aposta da Deputación pola creación de emprego e o apoio ao empredemento, que se desenvolverá en tres ámbitos: o primeiro comprenderá accións dirixidas aos centros de ensino secundario, bacharelato e formación profesional para que a mocidade vexa o emprendemento como unha vía con posibilidades para o seu futuro; o segundo vai dirixido ás persoas emprendedoras, ás que se lle ofrecerá asesoramento nos seus proxectos para que se consoliden e expandan do mellor xeito posible; e o terceiro e último consistirá nun servizo de apoio para que esas pequenas empresas logren acceder a diversas liñas de financiamento”, explicou Valentín González Formoso, que destacou a importancia de contar nesta misión co “coñecemento e experiencia da Cámara de Comercio de Santiago”.

Pola súa banda, María Pais destacou o compromiso da Cámara "co fortalecemento do tecido empresarial e a promocióndo crecemento empresarial e o emprego da demarcación cameral, traballando en estreita colaboración cos axentes clave do territorio, como é a Deputación, polo que agradeceu o compromiso compartido para lograr un desenvolvemento socioeconómico sostible e equitativo".