Oroso e Ordes promocionan os recursos do Camiño Inglés

O parque da Rúa de Miño acolleu este sábado o acto inaugural da oitava edición da feira Primavera no Camiño Inglés, unha cita xa consolidada que reúne aos 18 concellos polos que discorre esta ruta. Organizado pola Asociación de Concellos do Camiño Inglés e a Deputación da Coruña, o evento tivo como obxectivo dar a coñecer os atractivos turísticos, culturais, naturais e gastronómicos da ruta que conecta Ferrol con Santiago.

A inauguración contou coa presenza do alcalde de Miño, Manuel Vázquez Faraldo, como anfitrión, así como co presidente da Asociación de Concellos do Camiño Inglés e alcalde de Pontedeume, Bernardo Fernández, e o deputado provincial de Deportes, Antonio Leira. Xunto a eles, asisitiron alcaldes, alcaldesas e representantes institucionais dos 18 municipios polos que discorre o Camiño: Ferrol, Narón, Neda, Fene, Cabanas, Pontedeume, Miño, Paderne, Betanzos, Abegondo, A Coruña, Culleredo, Cambre, Carral, Mesía, Ordes, Oroso e Santiago.

Durante a xornada, cada un dos concellos presentou a súa oferta turística a través de postos informativos, degustacións de produtos típicos locais, showcookings en directo, presentacións literarias e actuacións musicais.

«Esta celebración é un exemplo de como o Camiño Inglés é moito máis que unha ruta de peregrinación; é un eixo vertebrador que nos une e nos permite compartir o mellor de nós mesmos», explicou Vázquez Faraldo.

Pola súa parte, Bernando Fernández destacou «a importancia da cooperación entre concellos para poñer en valor un Camiño que non só forma parte da nosa historia, senón que é tamén unha oportunidade de futuro para as nosas vilas e cidades».

Por outra banda, Antonio Leira puxo en valor o traballo dos concellos e da asociación por consolidar unha cita anual, que «converte o Camiño nun espazo de encontro, participación e posta en valor do que nos une como territorio».