Éxito de participación na primeira ruta teatralizada 'Terras da Raíña Lupa' por Teo, Brión e Rois

Máis de medio cento de persoas participaron este domingo na primeira edición da ruta teatralizada Terras da Raíña Lupa, unha actividade singular que combinou natureza, patrimonio e teatro en paraxes emblemáticos dos concellos de Teo, Brión e Rois.

A proposta cultural, conducida polo guía Suso Martínez, comezou no Cruceiro de Francos e percorreu espazos de gran valor histórico e paisaxístico como a Carballeira de Francos, a Ponte de Paradela, a aldea abandonada de Cabanas, o mítico Castro Lupario e Angueira de Castro, ata rematar nos arredores do Pazo do Faramello e o seu simbólico Xardín do Recordo.

Durante a ruta, os asistentes tiveron a oportunidade de revivir lendas celtas e romanas, mergullarse nas historias dos antigos habitantes da zona e mesmo interactuar con personaxes históricos, como o soldado romano Lucio Pinario, interpretaado en vivo no escenario natural do Castro Lupario.

Esta actividade forma parte das asociacións de promoción do xeodestino Terras de Santiago, impulsadas polo GDR Terras de Compostela, co obxectivo de dinamizar o turismo sostible e poñer en valor o patrimonio cultural da comarca.

A ruta terá unha nova oportunidade de participación o domingo 7 de setembro, unha segunda convocatoria que promete repetir o éxito desta primeira edición.