Liberan de maleza o único menhir da Costa da Morte, situado na Laracha

O Concello da Laracha está a acometer labores de limpeza e acondicionamento na parcela na que se atopa o menhir de Erboedo, o único exemplar deste tipo do que se ten constancia na Costa da Morte e que forma parte do patrimonio municipal.

Os traballos, que se realizan baixo control arqueolóxico, consisten na roza da vexetación e limpeza do contorno coa fin de preservar a visibilidade do menhir e asegurar a súa correcta integración paisaxística.

O conxunto das Torres de Cillobre xa é patrimonio público da Laracha

"O obxectivo final é poñer en valor este destacado elemento para que se atope nas mellores condicións posibles para animar á veciñanza a visitalo e coñecer o legado histórico larachés", subliñan dende o goberno local.

Con esta iniciativa o Concello reafirma o seu compromiso coa protección, conservación e difusión do patrimonio cultural do termo municipal, "promovendo ao tempo o coñecemento da historia local e fomentando o turismo sostible vinculado aos bens culturais".