Sete rutas guiadas percorrerán nos vindeiros meses as terras de Arzúa

A Concellaría de Turismo de Arzúa vén de poñer en marcha o programa Arzúa Camiña, unha nova iniciativa que convida á veciñanza a descubrir o territorio a través de sete rutas a pé, guiadas e de balde.

As andainas realizaranse en diferentes sábados entre os meses de xuño, agosto, setembro e outubro, e servirán para percorrer algúns dos lugares con máis encanto e riqueza natural do municipio.

O ciclo comezará o 14 de xuño cunha ruta de 15 quilómetros polo sendeiro das Corredoiras. A segunda cita será o 28 de xuño cun percorrido de 12,3 quilómetros por Fonte Santa. O 30 de agosto realizarase a terceira andaina, que comezará na ermida da Mota e conta cunha distancia de 11 quilómetros. O programa continuará o 13 de setembro polo val do Iso, de 12 quilómetros. A quinta cita celebrarase o 27 de setembro pola ruta da fervenza das Hortas, cun percorrido de 17,5 quilómetros. A seguinte será o día 11 de outubro, polo Camiño Francés: Boente-A Calzada, cunha lonxitude de 14 quilómetros. Finalmente, o ciclo pecharase o 25 de outubro cunha ruta polo embalse de Portodemouros de 12,5 quilómetros.

Para participar é necesario inscribirse previamente na oficina de Turismo, no teléfono 981 50 80 56 ou no correo info@turismoarzua.gal.