O BNG pide unha reforma "inmediata" da N-550 en Ordes para mellorar a seguridade

O deputado do BNG, Néstor Rego, acompañado polo grupo municipal nacionalista liderado por Pablo Vidal, a responsable comarcal da organización, Elvira Cienfuegos, e a deputada do BNG no Parlamento galego, Iria Carreira, avanzou este mércores en Ordes o rexistro de iniciativas nas Cortes do Estado para que o Goberno leve a cabo actuacións de mellora na N-550 ao seu paso pola localidade.

«O Ministerio debe atender as demandas veciñais que lle foron achegadas a través dos pregos de sinaturas e iniciar, canto antes, as necesarias melloras», sinalou Rego, que engadiu que os problemas que presenta a estrada «precisan dunha atención inmediata».

Entre as actuacións máis urxentes, o deputado destaca que é preciso «analizar as alternativas para lograr unha incorporación segura desde a parroquia de Pereira». Entre as propostas están «a creación dun novo carril» ou a «instalación dunha rotonda».

Tamén piden dende o BNG facilitar o cruzamento da vía entre os núcleos de Moscoso e A Reboira a través da habilitación dun paso subterráneo.

Por outro lado, a organización nacionalista demanda iniciar as actuacións para abrir novas vías de servizo en Canedo, A Piolla ou Axás para «contribuír á mellora da seguranza viaria».