Melide aproba a Conta Xeral de 2024 con resultados positivos e sen débeda bancaria

O Concello de Melide celebrou este mércores 4 de xuño a súa sesión plenaria ordinaria, na que se aprobaron varios asuntos relacionados coas finanzas municipais como a Conta Xeral do Exercicio 2024 ou un Plan Económico Financieiro.

O concelleiro de Facenda, Xosé Igrexas, destacou a "solidez das contas municipais", con resultados positivos na maioría de magnitudes. Así, Igrexas subliñou que o remanente de Tesourería de 2024 ascende a 4.036.605,80 euros, case 34.000 euros que o ano anterior, a pesar de ter gastardo 1,8 millóns do remanente ao longo do exercicio. "Unha magnitude máis que positiva que demostra a solvencia económica do Concello", aseverou.

Por outro lado, tamén descatou o incremento do aforro neto, que acadou os 1.567.654,10 euros, máis de 450.000 € por riba do ano anterior. Ademais, o resultado orzamentario positivo foi de 1.226.663,31 euros, case cinco veces superior ao rexistrado en 2023.

Tamén destacou Igrexas que, no relativo ao período medio de pagamento, o Concello destaca "como unha das entidades que menos tempo tarda en facer fronte a estas obrigas", situándose en 0,85 días.

Por outra banda, a única magnitude que conta cun resultado negativo é a Estabilidade Orzamentaria, que se pechou en 2024 cun saldo negativo de 53.293,54 €, vinte veces menor que o de 2023. "Foi un gran esforzo conseguir este dato nun só ano e quedamos moi preto de conseguir un resultado positivo", explicou Igrexas.

Para afrontar esta situación, o Pleno tamén aprobou un Plan Económico Financieiro (PEF) para os exercicios 2025 e 2026. O plan inclúe medidas correctoras "sinxelas" e que "non repercuten" na veciñanza, e que consisten no control da anualidade orzamentaria, o compromiso dun remanente de Tesouraría positivo e o non financiamento a través de préstamos.

Medallas de Ouro do Concello

Durante a sesión ordinario deste mércores aprouse por unanimidade a concesión da Medalla de Ouro do Concello á agrupación Os Meliados, polos seus 25 anos de traxectoria cultural "levando o nome de Melide por todas partes", e ao doutor Eladio García Rodríguez, a título póstumo, polo seu compromiso coa localidade.