O Concello de Vimianzo reabre a rúa Braña da Grixa tras concluír a súa rehabilitación integral

O Concello de Vimianzo rematou as obras de rehabilitación integral e repavimentación da rúa Braña da Grixa, no treito comprendido entre a AC-552 e a esquina coa rúa Codeseiras. Este xoves procedeuse á reapertura do tráfico rodado na zona.

A actuación incluíu a ampliación da calzada e a mellora do firme, a renovación da rede de saneamento, a execución de sendas peonís e a instalación de novos sistemas de iluminación. Ademais, no marco desta intervención, habilitáronse un total de 67 prazas de aparcamento.

Xunta y Concello estudian reforzar la seguridad del acceso norte a Vimianzo

Deste xeito, os traballos, que contaron cun orzamento de 166.102 euros, permitiron renovar completamente a estrada, ao tempo que se crearon novas prazas de aparcamento e beirarrúas, mellorando de xeito notable a seguridade peonil.

A alcaldesa, Mónica Rodríguez, subliñou que se trata dunha actuación "moi importante, coa que melloramos de maneira notoria as condicións de seguridade dos veciños e veciñas da zona e o ordenamento da seguridade viaria”.

Engadiu que, ademais, “permitiunos seguir coa nosa aposta por darlle protagonismo aos peóns, garantindo a súa seguridade ao proporcionarlle un espazo seguro para camiñar. Ao mesmo tempo, aumentamos o volume de prazas de aparcamento, algo moi demandado”.

A rexedora agradeceu a “colaboración de todos os veciños e veciñas da zona pola súa comprensión durante a execución das obras”.

Con esta actuación, desde o Concello de Vimianzo reafirman o seu compromiso coa mellora de infraestruturas e coa creación de espazos máis accesibles e seguros.