A Laracha crea puntos de lectura LGTBI en tres bibliotecas polo Mes do Orgullo

O Concello da Laracha vén de poñer en marcha unha iniciativa para visibilizar a literatura con temática LGTBI nas bibliotecas municipais da Laracha, Paiosaco e Caión. Con motivo da celebración do Mes do Orgullo, habilitáronse puntos de lectura específicos que reúnen unha ampla selección de obras relacionadas con esa temática.

Os puntos de lectura inclúen títulos de poesía, narrativa e teatro dirixidos ao público infantil, xuvenil e adulto. «O obxectivo é ofrecer un espazo visible e accesible que contribúa á sensibilización, inclusión e respecto pola diversidade, ademais de fomentar o achegamento á cultura LGTBI a través da lectura», sinalan dende o Concello.

Estes puntos permanecerán dispoñibles durante todo o mes de xuño e poden visitarse libremente nas instalacións das tres bibliotecas municipais.

Ensinarán aos escolares da Laracha as técnicas da reanimación cardiopulmonar

Os membros do Espazo de Participación Infantil e Adolescente (EPIA) tamén se implicaron na iniciativa, visitando o punto de lectura da biblioteca municipal da Laracha para coñecelo de primeira man e facer propostas para mellorar e ampliar este tipo de accións no futuro. Todas as persoas interesadas poden achegarse xa aos tres centros de lectura para consultar as obras dispoñibles.

Compromiso coa igualdade

«Con esta actuación o Concello reafirma o seu compromiso coa igualdade, a inclusión e os dereitos das persoas LGTBI», subliñan dende o Goberno local, que preside José Manuel López.